क्रेडाईच्या एक्स्पोला नागरीक गृह खरेदीसाठी भेटी देत असतात. तेथे येणार्‍या ग्राहकाच्या सुविधेसाठी एका कोपर्‍यात टॉयलेट (मुतारी) उभारण्यात आले. पण या टॉयलेटची घाण सर्व मैदानात पसरली आहे. त्यामुळे प्रदर्शन परिसरात दुगर्ंंधी पसरली आहे. येथे येणार्‍या नागरिकांना नाक दाबून प्रदर्शन पाहावे लागत आहे. वास्तविक बांधकाम व्यावसायिकांचे हे प्रदर्शन आहे. हे प्रदर्शन पाहणार्‍यांसाठी उभारण्यात आलेली मुतारी ही मंडळी जर व्यवस्थित उभारू शकत नाही तर चांगली घरे कशी उभारतील, असे नागरिकांमध्ये बोलले जात होते.

सांजवार्ताने याबद्दल क्रेडाईच्या क्रेडिटीबिलिटीवर शंका या मथळ्याखाली दोन दिवसांपूर्वी वृत्त दिले होते. हे वृत्त प्रकाशित होताच अनेकांनी सांजवार्तात फोन करून, प्रत्यक्ष भेटून वेगवेगळ्या बांधकाम व्यावसायिकांनी आपल्याला कसे फसवले याची जंत्रीच सांजवार्तासमोर मांडली. एवढेच नव्हे तर काहींनी वैयक्तिक व्यवहार, व्याजाने घेतलेले व्यवहार, शब्द फिरवलेले व्यवहार आदी बद्दल माहिती दिली. सांजवार्ता कोणाच्याही वैयक्तिक भानगडीमध्ये कधीही पडत नाही आणि पडणारही नाही. परंतु सदनिका खरेदी करणार्‍या जनसामान्यांना दिलेल्या शब्द जर पाळला नाही तर सांजवार्ता त्याच्यासोबत हिरहिरीने उभा राहून नियम मोडणार्‍या व्यावसायिकाचा पर्दाफाश केल्याशिवाय राहणार नाही.

क्रेडाईच्या महाएक्स्पोचे आयोजन पदाधिकार्‍यांच्या उदोउदोसाठी व मलिदा लाटण्यासाठी असल्याची शंका तेथे लावलेल्या बांधकाम व्यावसायिक स्टॉल धारकांनी सांजवार्ता चमूकडे बोलून दाखवली. त्याला कारणही तसेच आहे. क्रेडाईने प्रत्येक स्टॉलला अंदाजे पाच दिवसांसाठीे १ लाखापेक्षा जास्तीचे भाडे आकारले आहे. समोरच्या रोसाठी त्याहूनही जास्तीचे भाडे असल्याची माहिती हाती लागली आहे. स्टॉल धारकांनी अव्वाच्या सव्वा भाडे भरूनही त्यांना पाहिजे तेवढा प्रतिसाद मिळाला नाही. एका स्टॉल धारकाने तर मला अद्याप एकही बुकिंग मिळाली नसल्याची खंत आमच्या प्रतिनिधीकडे व्यक्त केली. तर दुसरीकडे क्रेडाईचे पदाधिकारी प्रसारमाध्यमांना हाताशी धरून स्वतःचा फोटो छापत उदोउदो करून भरपूर प्रतिसाद मिळाला, एवढ्या बुकिंग झाल्या अशा शेखी मिरवल्या हे सर्वश्रुत आहे.

क्रेडाईच्या वतीने सुरू असलेले ड्रीम होम प्रदर्शनात उद्घाटनाच्या दिवशी पासून बाऊन्सर ठेवण्यात आले आहेत. परंतु दांडिया महोत्सव किंवा इतर सेलिब्रिटी येणार्‍या कार्यक्रमात काही गैरप्रकार होऊ नये यासाठी बाऊन्सरला बोलविण्यात येत असते. परंतु क्रेडाईच्या सुरू असलेल्या ड्रीम होम प्रदर्शनात चक्क बाऊन्सरचा थाट दिसून येत आहे. खर तर या प्रदर्शनात घर खरेदीसाठी लोक येणार आहेत. गोंधळ होण्याचा कुठलाही प्रश्न नाही. त्यामुळे बाऊन्सरचा थाट कशासाठी? घातला गेला असाही प्रश्न आता उपस्थित केला जात आहे. आपल्या स्वप्नातील घर अशी संकल्पना या क्रेडाई संघटनेने ठेवण्यात आली आहे. परंतु स्वप्नांचे घर शोधण्यासाठी येणार्‍या सर्वसामान्य ग्राहक गोंधळ थोडी घालणार आहेत? त्यामुळे बाऊन्सरचा थाट नेमका कुणाला दाखविण्यासाठी घातला आहे. यावर देखील आता प्रश्नचिन्ह निर्माण झाले आहे.